Тухлан сууж таалан соёрхоорой

Би "Сантис" боловсролын төвд саяхнаас сурч эхэлсэн юм. Эхний өдөр ч яахав уур амьсгал, багшийн ур чадвар гээд бүгд л давгүй байлаа. Харин дараагийн өдөр нь Стийв гэдэг Америк багш ордог юм байна. Тэгсэн хичээлийн дундуур Улаанбаатар хотынхоо талаар ярихаар боллоо. Гэтэл манай ангийнхан юу гэсэн гээч. Манай хот утаатай, гэр хорооллоор дүүрсэн, хаа сайгүй хог новш, архичин тэнүүлчнээр дүүрсэн аймшгийн балгас гэх нь л холгүй ярих юм. Яахав дээ энэ үнэн ч гэсэн олгой хагаравч гэдсэн дотроо гэдэг биз дээ. Гадны хүнд хамаг муу муухайгаа дэлгээд, ганц ч сайхан зүйлийг нь яагаад хэлж ч болохгүй гэж? Энэ болохгүй, тэр ч бүтэхгүй гээд яриад байвал дуусахгүй, харин бүгдийг засч залруулах, гоё сайхан талаас нь яагаад харж болохгүй гэж. Сиймхий ч гэсэн гэр минь, сэгсгэр ч гэсэн ээж минь гэдэг байх аа. Миний хот удахгүй тэр дэлхийн гоё  сайхан, өндөр хөгжилтэй хотуудаас ч сайхан болно гэдэгт би итгэж байна.